|
خلوا الخواطر تهدا
لا تذكروا ليل العـذاب وسهده
لا قطفة نواوير الغــرام وشهده
لا فرطة الياس بقــوته وسلاحه
لا دمع .. لا طفسة غلا في مـهده
لا فكة ارمام الصوب من مطراحه
لا ذوحة الخاطر في اوهـاد وغرده
لا خلية مواكير الغــلا ومراحه
لا حـرقة مواثيق العـزيز وعهده
لا صـــولة ليالي قاسيه سفاحة
خلوا الخاطر غارق
في صمـت .. اوراق المحـبه حارق
باقتناع كيف حرقة مراكـب طارق
عند المضــيق وقــولته بصراحة
قدامكم عـدو واللي يعـاود غارق
بين الشهـاده والخــنوع مساحة
في تخمـيمي
يغفــن ولا يصحن على تجـريمي
نسيت ما مضى بادرت في تسليمي
كيف مانسى العربى الذل اجـتاحه
نسى ماجرى في الحرم ( لابراهيمي )
" قــانا " وعبرات النسا النواحه
حبـس الحجاره في سـجون غريمى
على اطفــالها فارد الليل جناحه
ماقبل حوته راضن
ولاقبل حـوته ع العزيز تغـاضن
وجفن مواقــيهن بعـد مافاضن
سيل عـرم تزيف من بعيد ارياحه
ما سلـمن ليام نين تقـــاضن
اثمان باهضه من ليل غاب صباحه
ما سلمن ليـام نين تقـــاضن
نصفة الخاطر يوم طلــق سراحه
لا دردروا امعطنهن
سبيل للضـمايا في سنـين وحلهن
ينهاسن وماينسن عــوايد هلهن
يجودن طــرابه والسـنين كلاحه
شاربات المــروه في سقف ظللهن
مرفوع الكــمام الى وسيع براحه
هيف وذرا للـــى الوقت خذلهن
نفوس حايره في اجـسادها منذاحه
رهاف حس يبكــن قبل ما يبللهن
دمــع العزيز اللى الصغا استباحه
فكن قيود الاســر مـن كاحلهن
مدن ايديهـن للحــياة فـراحه
بعد حمل شــالنه على كاهـلهن
ماضي حـزين بظلمـته واشباحه |
